COOPERATIVA O RODO. A comezos dos anos 80, dentro do proceso de modernización das explotacións gandeiras que percorría toda Galicia, unha serie de gandeiros empezan a mobilizarse en Rodeiro. Na encrucillada entre a produción e a venta de leite, dúas voces comezan a albiscar unha nova folla de ruta e deciden unir as súa forzas para chegar a un novo destino. Os seus nomes: Pepe Vence Deza e Fernando Fernández Hermida; a súa meta: constituír unha asociación e afrontar a venta de leite en conxunto. En 1984, logo dunha longa rolda de conversas reúnense cos gandeiros produtores de leite da zona e, xuntos, crean a Asociación A Camba.

O espírito cooperativista da Asociación A Camba será a semente da que, en outubro de 1988, xermine a Cooperativa O Rodo. Nada cunha vontade de colaboración e unión que lle dese voz e forza aos gandeiros de Rodeiro, a cooperativa experimenta nos seus primeiros anos de vida un forte crecemento, sendo a máis grande e rendible da zona.

O traballo en equipo e a visión de futuro dos cooperativistas, consolidada na década dos 90, cristalizou no ano 2000 coa entrada de O Rodo na cooperativa de segundo grao Xuncoga, ostentando a maior participación (un 26,9%) do conxunto. O 10 de Maio de 2005, O Rodo fusiónase coa sociedade cooperativa Carboar, formando así unha única cooperativa de bovino en Rodeiro: O Rodo Sociedade Cooperativa Galega.

O Rodo S. Coop. Galega crece na venda de leite e nos servizos de substitucións nas explotacións, así como na oferta e servizo de xestión de explotacións, de alimentación, de calidade do leite, de reprodución e de maquinaria -este último con moita evolución nos últimos anos. A nova cooperativa conta cunhas instalacións de 1000 m² sitas no local social de Rodeiro, ademais dunha nave de 300 m² en Carboentes. No ano 2009, mércase unha parcela de 10000 m² na que se prevé construír unhas novas instalacións que inclúan unha nave e servizo de gasolineira.

O crecemento de O Rodo experimentou un novo episodio no 2014, ano no que entra a formar parte na sociedade Acolat, Agrupación de Cooperativas Lácteas de Galicia (Clesa), con 700 títulos ou accións. Na actualidade a cooperativa, que está a investir entre 300.000 e 450.000 € todos os anos para o servizo de maquinaria, conta cunha facturación que supera os 3 millóns de euros anuais.

A unión de forzas e o desexo de combater a precaria situación dos gandeiros galegos actuaron como combustible para O Rodo S. Coop. Galega. O afán cooperativista afianzouse en Rodeiro e, con paso firme e constante, fixo de O Rodo un referente no cooperativismo galego que, a día de hoxe, ten socios nos concellos de Rodeiro, Dozón, Piñor, Taboada, Antas de Ulla e Chantada.